VOV4.Êđê -  Aguah 20/1, K’iăng Khua knŭk kna Phạm Bình Minh ksiêm dlăng bruă rơ̆ng klei êđăp ênang bruă êdeh phiơr leh anăn hdră gang mkhư̆ klei ruă tưp ti Tač êdeh phiơr Nội Bài. Čiăng rơ̆ng êđăp ênang leh anăn dưi ktuê dlăng jăk klei ruă Covid-19 ti Tač êdeh phiơr Nội Bài, ngă bruă jăk kơ mnuih ƀuôn sang drông thŭn bhang mrâo, Tết nguyên đán, knăm mơak yan mnga leh anăn hlăm jih thŭn 2022, K’iăng Khua knŭk kna Phạm Bình Minh mtă kơ Phŭn bruă êlan klông dŭ mdiăng mjêč mă bruă hŏng phung khua êmua dŭm ala čar čiăng bi tŭ ư mđĭ hnơ̆ng dŭm gưl phiơr hŏng ala tač êngao, đru kơ mnuih ƀuôn sang wĭt kơ ala čar čuă găp djuê leh anăn drông Tết nguyên đán.

K’iăng Khua knŭk kna Phạm Bình Minh mtă kơ Knơ̆ng bruă êdeh phiơr Việt Nam, dŭm knơ̆ng bruă êdeh phiơr ngă bi jăk dŭm klei kčah kơ klei êđăp ênang leh anăn gang mkhư̆ klei ruă Covid-19.

H’Zawut pô mblang