VOV4.Êđê - Hruê 16/5, ti Anôk bruă Knŭk kna, K’iăng Khua knŭk kna Phạm Bình Minh, Khua Êpul mă bruă mrô 1 kơ klei ksiêm dlăng, ruh mgaih klei dleh dlan, mđĭ ptal bruă brei čan prăk knŭk kna thŭn 2022 gĭt gai klei bi kƀĭn hŏng 9 Phŭn, dhar bruă mâo hnơ̆ng brei čan êmưt hĭn mkă hŏng kluôm ala. Bi ala kơ 9 Phŭn, dhar bruă lač leh kơ klei dleh dlan, gun kpăk djŏ tuôm kơ bruă ruh mgaih anôm ala, hlăk êjai dŭm hdră bruă mrâo čiăng mâo lu hruê mmông bi leh hră mơar duh bi liê hlue si hdră kčah. Đa đa hdră bruă dưi pŏk ngă ti lu alŭ wăl, klei dưi mơ̆ng dŭm anôk bruă kriê dlăng, pô duh bi liê adôk lu klei kƀah. Dŭm anôk bruă akâo kơ Khua knŭk kna brei bi kdung sui hdră kčah duh bi lie eprăk knŭk kna thŭn 2021 kơ thŭn 2022, mbĭt anăn mtă kơ Phŭn bruă rŭ mdơ̆ng ksiêm dlăng, hưn hŏng Knŭk kna mâo hdră msir đru ruh mgaih klei dleh dlan kơ phung rŭ mdơ̆ng hmaĭ kyua ênoh mnơ̆ng dhơ̆ng rŭ mdơ̆ng đĭ lu.

H’Zawut  pô mblang