VOV4.Êđê - Tlam mbrue (20/1), k’iăng khua knŭk kna Phạm Bình Minh, Khua kiă kriê dhar bruă răng mgang klei êđăp ênang ala čar nao čuă lehanăn mă leh bruă hŏng Anôk bruă kahan ksiêm êlan klông, hlăm Phŭn bruă kahan ksiêm. Thŭn êgao, găn lu klei dleh dlan, klei lông dlăng, ƀiădah kahan ksiêm mâo bi leh jăk mta kñăm. Boh klei truh tơl hlăm êlan klông thŭn êgao hrŏ hlăm jih 3 ênoh čuăn kčah kơ ênoh bi drăm, ênoh djiê, lehanăn ênoh êka mkă hŏng thŭn 2020. Hlăm thŭn kahan ksiêm êlan klông mâo ngă leh hră mơar, lehanăn mghaih msir truh 2 êklăk 900 klei ngă soh hlăm êlan klông, đŭ giăm 3 êbâo êklai prăk. Blŭ hrăm ti anôk mă, k’iăng khua knŭk kna mtă hlăm wưng tết nguyên đán anăp truh, kahan ksiêm êlan klông bi tiŏ nao mđĭ lu hĭn bruă ksiêm dlăng, mghaih msir bi ktang klei ngă soh, anăn yơh jing pô phŭn ba klei truh tơl hlăm êlan klông./.

Y-Khem pô mblang