VOV4-Êđê- Ti Đà Nẵng, aguah mbruê 25/7, khua hlăm phŭn bruă kđi čar, k’iăng Khua knŭk kna Phạm Bình Minh mbĭt hŏng êpul ngă bruă mâo leh klei nao čuă, mđup brei hnư mnơ̆ng ti anôk bruă rông ba phung mâo bruă tŭ dưn, kahan êka êkeh ti ƀuôn prŏng Đà Nẵng, jing anôk dôk rông ba, kriê dlăng 48 čô mâo bruă tŭ dưn leh anăn găp djuê phung lĭng kahan djiê êngiă amâo mâo anôk knang.

K’iăng Khua knŭk kna Phạm Bình Minh mâo klei êmuh čuă phung amĭ, lĭng kahan êka êkeh, čih yap leh anăn pah mni dŭm klei gĭr mơ̆ng êpul khua kiă kriê, phung mă bruă ti anôk bruă kyua klei rông ba, kriê dlăng phung mâo bruă tŭ dưn. K’iăng Khua knŭk kna mtă kơ anôk bruă lŏ ngă jăk dŭm bruă anăn. Leh anăn k’iăng Khua knŭk kna Phạm Bình Minh mbĭt hŏng êpul ngă bruă mâo klei nao čuă, mđup brei hnư mnơ̆ng kơ dŭm gŏ sang knŭk kna dlăng ba êdah êdi.

Pô mblang: Y-Ƀel Êban