VOV4.Êđê- Aguah mbruê, phŭn bruă hŏng tač êngao leh anăn êpul hgŭm blŭ klei Prăng (OIF) bi mguôp mkŏ mjing klei kƀĭn bruă duh mkra gưl dlông êpul hgŭm blŭ klei Prăng. K’iăng Khua knŭk kna Phạm Bình Minh leh anăn khua kiă kriê êpul hgŭm blŭ klei Prăng Louise Mushikiwabo gĭt gai klei kƀĭn anei. Blŭ hlăm klei kƀĭn, K’iăng Khua knŭk kna Phạm Bình Minh mñă klă, Việt Nam mâo leh klei mlih leh anăn dôk mlih ktang phĭt jing mđĭ kyar bruă duh mkra mtah. Knŭk kna bi klă leh lu hdră bruă, hdră êlan prŏng, hlăm anăn mâo hdră ala čar kñăm kơ klei đĭ kyar mtah wưng thŭn 2021 -2030, hdră tă truh thŭn 2025, hŏng mta kñăm mtrŭt mđĭ mkŏ wĭt bruă duh mkra nao mbĭt hŏng mlih mrâo klei bi hmô đĭ kyar bruă duh mkra kjăp kơ wăl hdĭp mda leh anăn klei mtăp mdơr yang ƀuôn, mđĭng truh kơ bruă duh mkra mtah, bi kna hnơ̆ng carbon leh anăn đru mguôp hlăm mta kñăm bi hrŏ klei boh lăn đĭ hlơr.

Pô mblang: Y-Khem Niê