VOV4.Êđê- Tŭ ư klei iêo jak mơ̆ng knŭk kna China, hruê mbruê 16/9, K’iăng Khua knŭk kna Phạm Bình Minh nao hgŭm leh anăn blŭ hlăm knăm pŏk klei čhĭ mnia ASEAN – China leh anăn klei kƀĭn trông gưl dlông bruă mnia mblei, duh bi liê ASEAN – China (CAEXPO leh anăn CABIS) gưl tal 19 ti Nam Ninh, wăl čŏng kiă kriê Choang Quảng Tây, China hŏng êlan mdar rup. Blŭ hlăm knăm pŏk, K’iăng Khua knŭk kna Phạm Bình Minh yap yuôm bhăn bruă 2 tĭng mkŏ mjing klei mjĕ giăm bi mguôp hdră êlan kluôm ênŭm kyua klei êđăp ênang, mdrŏng sah leh anăn đĭ kyar kjăp. ASEAN leh anăn China lŏ dơ̆ng jing ƀĭng hgŭm mnia mblei prŏng hŏng hdơ̆ng pô, hŏng hnơ̆ng klei mnia mblei 2 tĭng thŭn 2021 kdlưn ka tuôm mâo jing êbeh 669 êklai USD. K’iăng Khua knŭk kna Phạm Bình Minh mñă kơ knŭk kna China mkŏ mjing klei găl blei mnia lu hĭn mnơ̆ng dhơ̆ng, boh mnga bruă lŏ hma hnơ̆ng tŭ jăk mơ̆ng Việt Nam leh anăn dŭm ala čar hlăm ASEAN mdiăng mnơ̆ng dhơ̆ng găn Việt Nam, mtrŭt mđĭ klei bi mguôp hŏng klei mlih mrâo, klei mlih mrô, bruă duh mkra mrô, mnia mblei điện tử, mđĭ hĭn klei bi mguôp hlăm bruă mđĭ kyar mtah, mđĭ kyar kjăp.

Pô mblang: Y-Ƀel Êban