VOV4.Êđê - Aguah hruê 15/8, K’iăng khua knŭk kna Phạm Bình Minh nao ti Hruê jih jang mnuih ƀuôn sang răng mgang klei êđăp ênang ala čar thŭn 2022 ti să Việt Dân, wăl krah Đông Triều, čar Quảng Ninh. Blŭ ti knăm anei, K’iăng khua knŭk kna bi mni kơ boh tŭ hlăm hdră bruă anei ti să Việt Dân thŭn 2022, boh nik boh tŭ hlăm hdră mđĭ kyar bruă duh mkra lehanăn ba să anei dưi djăp hnơ̆ng čuăn ênuk mrâo tal êlâo mơ̆ng kluôm ala.

K’iăng khua knŭk kna mtă kơ dŭm gưl bruă Đảng, bruă knŭk kna, Anôk bruă mặt trận Việt Nam dŭm gưl, dŭm êpul bruă ala ƀuôn ti čar Quảng Ninh lŏ dơ̆ng mđing hĭn kơ “Hruê jih jang mnuih ƀuôn sang răng mgang klei êđăp ênang ala čar” klă sĭt mâo boh tŭ dưn hlăm bruă klam kđi čar – dhar kreh, ala ƀuôn mơ̆ng alŭ wăl. Ƀri gưl anei, K’iăng khua knŭk kna mđup brei leh mnơ̆ng kơ dŭm gŏ sang êdah êdi hlăm hdră anei hlăm să Việt Dân; Lu êpul lehanăn mnuih mâo boh tŭ hlăm hdră anei ti să Việt Dân mâo mđup brei hră pah mni./.

H’Nêč pô mblang