Drông Khua bi ala Mi ti Việt Nam Marc E. Knapper, K’iăng Khua knŭk kna Trần Hồng Hà lač, hlăm wưng êgao, klei bi hgŭm Việt Nam - Mi ƀrư̆ hruê ƀrư̆ kjăp hŏng bruă pŏk ngă dŭm hdră msur kơ klei mdrơ̆ng hŏng bi mlih yan adiê, msir klei jhat mơ̆ng êa drao ruă dioxin, bi mlih êa pui êwa čuh mtăp mđơr (JETP)…K’iăng Khua knŭk kna Trần Hồng Hà  bi mklă: dŭm bruă dlông rŏng lăn jing tur knơ̆ng bi hgŭm yuôm bhăn plah wah Việt Nam leh anăn Mi, mđĭ klei bi hgŭm klă sĭt, êlam, ba klei yuôm bhăn kơ mnuih ƀuôn sang dua ala čar, mbĭt anăn đru msir mgaih klei mâo kluôm rŏng lăn.

 Drông Khua bi ala knhăk kluôm Belanda ti Việt Nam Kees van Baar, K’iăng Khua knŭk kna Trần Hồng Hà brei thâo: Hlăm wưng kơ anăp, dua ala čar brei pŏk mlar klei bi hgŭm, mơ̆ng anăn mđĭ hnơ̆ng, mjing ai êwa, tur knơ̆ng bi hgŭm hlăm klei đăo knang, tŭ dưn. K’iăng Khua knŭk kna bi mni kơ ƀĭng hgŭm, anôk bruă duh mkra Belanda hgŭm hlăm hdră lông ba yua pui kmlă êran hŏng pil yang hruê dưm ti čuôr sang mơ̆ng anôk bruă knŭk kna, sang hră, sang êa drao, hdră bruă êpul êya, hgŭm hlăm hdră lông ngă ti Việt Nam čiăng bi leh hnơ̆ng ruah bi liê, klei bhiăn ksiêm hriăm, ba yua kdrăp mrâo, ksiêm dlăng bruă duh mkra, rơ̆ng êđăp ênang ala čar./.