Čiăng ruh mgaih klei dleh dlan, gun kpăk anei, čar Lâm Đồng akâo kơ Khua knŭk kna ksiêm dlăng mbŏ prăk bi liê Knŭk kna kơ dŭm hdră bruă ênoh prăk 3.332 êklai prăk, hlăm anăn 2.4100 êklai prăk kơ kdrêč Tân Phú – Bảo Lộc leh anăn 922 êklai prăk kơ kdrêč Bảo Lộc – Liên Khương. Mbĭt anăn, brei hdră bruă êlan dơ̆ng êran pral Tân Phú – Bảo Lộc dưi ba yua klei bhiăn đru kơ ênoh hrui wĭt hrŏ, hlue si hdră mtrŭn hlăm Mta 82, Hdră bhiăn duh bi liê hlue si hdră bi hgŭm knŭk kna hŏng êngao knŭk kna.

 Blŭ hrăm hlăm mmông mă bruă, K’iăng Khua knŭk kna Trần Hồng Hà bi mklă amâo dưi mđĭ ôh ênoh prăk knŭk kna bi liê kơ 2 hdră bruă anei. Khădah snăn, čiăng msir mgaih klei kơ ngăn prăk, K’iăng Khua knŭk kna mtă kơ dŭm Phŭn, dhar bruă djŏ tuôm mâo hră mơar kčĕ hŏng Khua knŭk kna čiăng ruh mgaih klei gun kpăk hlăm bruă iêo mkrum prăk mơ̆ng knơ̆ng prăk. Kyua hlue si hdră mtrŭn ară anei, hnơ̆ng prăk dưi kriê dlăng mơ̆ng phung duh bi liê amâo rơ̆ng 20% ênoh bi liê mơ̆ng hdră bruă snăn amâo djăp klei găl dưi čan ôh.

“Kâo akâo kơ Knŭk kna snăn Phŭn bruă ngăn prăk brei mâo klei ksiêm hriăm čiăng hưn mdah hŏng Khua knŭk kna ksiêm dlăng čiăng mâo hdră mtrŭn mơ̆ng Knŭk kna amâodah mkra mlih Hdră mtrŭn 78, wưng pŏk ngă bruă anei knư̆ hnưm knư̆ jăk. Kyua dŭm Hdră êlan knŭk kna bi mlih lu, kƀah klei sa hnơ̆ng leh anăn klei amâo myun hlăm bruă bi liê, wăt phung bi liê ăt msĕ mơh dŭm knơ̆ng prăk hrăm mbĭt anăn brei mâo hră m ơar đru kčĕ kơ Khua knŭk kna čiăng gĭt gai drei mă bruă anei sa hnơ̆ng, krŏng klei ƀuăn rơ̆ng mơ̆ng Knŭk kna”.

Kơ bruă dŭm hdră bruă êlan dơ̆ng êran pral mtŭk mtŭl čuăl mkă mnơ̆ng hlăm gŭ lăn, K’iăng Khua knŭk kna Trần Hồng Hà mtă kơ čar Lâm Đồng leh anăn phung bi liê hưn mdah hŏng dŭm anôk bruă kriê dlăng knŭk kna čiăng mâo klei ktrâo lač hlue ngă dŭm hdră msir djŏ guôp.

Êlâo anăn, hlăm mmông mă bruă, Khua gĭt gai Knơ̆ng bruă sang čư̆ êa čar Khánh Hòa hưn leh boh klei ksiêm dlăng klei dưi hlue ngă Hdră bruă êlan dơ̆ng êran pral Nha Trang – Đà Lạt. Hlue anăn, hdră bruă mâo boh dlông êbeh 80 km, hnơ̆ng 4 grông êlan, hnơ̆ng mkra mjing 80 - 100km/h. Ênoh bi liê hdră bruă mâo 25 êbâo êklai prăk, hlue si hdră bi hgŭm knŭk kna hŏng êngao knŭk kna PPP, klei kuôl kă BOT mâo Knŭk kna đru, hŏng ênoh prăk kčĕ jing 70% prăk Knŭk kna, adôk jing mơ̆ng phung bi liê, wưng bi leh jing 26 thŭn 9 mlan. Hdră bruă mâo ênhă 627ha, hlăm anăn mâo 409ha dliê mă kyâo, dliê mgang akŏ êa leh anăn mkra mjing Leh yua dŭm hdră msĕ si kban ti hang, mtih mgang… srăng dưi bi hrŏ 125 ha ênhă dliê hmăi djŏ.

 Hŏng hdră bruă êlan dơ̆ng êran pral anei, K’iăng Khua knŭk kna Trần Hồng Hà mtă kơ 2 čar Khánh Hòa leh anăn Lâm Đồng, Phung duh bi liê Êpul grup Sơn Hải leh anăn dŭm phŭn, dhar bruă djŏ tuôm brei hrăm mbĭt, ksiêm dlăng, mkŏ mjing bi leh dŭm hdră mnêč, klei bhiăn, boh nik ksiêm dlăng bi nik hdră msir kơ ngăn prăk./.