Hluê ngă klei gĭt gai mơ̆ng Khua knŭk kna, hruê 7/4, ti čar Tiền Giang, K’iăng khua knŭk kna Trần Hồng Hà hŏng Lê Minh Hoan – Khua phŭn bruă Lŏ hma mđĭ kyar krĭng ƀuôn sang lehanăn Đặng Quốc Khánh – Khua phŭn bruă Ngăn dŏ ưăl hdĭp mda gĭt gai Klei bi kƀĭn online hŏng dŭm alŭ wăl krĭng Dap mnai êa krông Cửu Long mâo: Tiền Giang,Bến Tre, Sóc Trăng, Cà Mau, Kiên Giang, Bạc Liêu, Long An kơ bruă anei.Yan bhang thŭn anei, hnơ̆ng êa ti krông Mê Kông hrŏ 7% mkă hŏng hnơ̆ng kah knar dŭm thŭn êlâo kyua anăn krĭng Dap mnai êa krông Cửu Long hmăi mơ̆ng klei trô̆ kma msĭn mơ̆ng hnưm.

Mkă hŏng lu thŭn, adiê hjan mâo hnui, boh nik mâo 3 gưl trô̆ kma msĭn mâo truh kơ mlan 5. Blŭ ti knăm anei, phung khua kiă kriê čar mtă kơ dŭm Dhar bruă gưl dlông lehanăn Knŭk kna đru kơ bruă mkra bi leh mbông mnuôr êa kluôm, ênao mgơ̆ng êa kba, dŭm hdră mkăp êa doh ti dŭm krĭng ktuê hang ksĭ, msir mghaih klei klưh hroh… Blŭ klah čŭn knăm anei, K’iăng khua knŭk kna Trần Hồng Hà mtă kơ dŭm alŭ wăl krĭng Dap mnai êa krông Cửu Long ksiêm mđing mă klei hriăm hlăm hdră mdrơ̆ng hŏng klei trô̆ kma msĭn, tĭng dlăng hnơ̆ng mâo êa kbăng, mâo hdră hdĭp sjŏ guôp hŏng klei trô̆ kma msĭn ti grăp alŭ wăl.