VOV4.Êđê- “Dŭm phŭn, dhar bruă gưl dlông brei mâo hdră msir kjăp hĭn čiăng mtrŭt mđĭ bruă mkăp prăk duh bi liê knŭk kna, msir mghaih hdră ka mâo mprăp djăp ênŭm hră m’ar êlâo kơ ba bruă dôk hlăm hdră duh bi liê knŭk kna”. Anei jing klei mâo K’iăng khua knŭk kna Vũ Đức Đam, Khua êpul mă bruă mrô 3 ti klei bi kƀĭn kơ bruă ksiêm dlăng, mtrŭt mđĭ, ruh mtlaih klei dleh dlan, mtrŭt mđĭ bruă mkăp prăk duh bi liê knŭk kna thŭn 2022 ti anôk mă bruă hŏng phŭn, dhar bruă gưl dlông mkŏ mjing hruê 17/5 ti Hà Nội. Hluê si klei hưn mơ̆ng Phŭn bruă Hdră kčah lehanăn Duh bi liê, hdră kčah prăk duh bi liê knŭk kna thŭn 2022 jao kơ anôk bruă truh 12.019 êklai prăk. Tĭng jih mlan 5, dŭm phŭn, dhar bruă mkăp leh hlăm brô 464 êklai prăk, mâo 3,86% hdră kčah thŭn 2022, ƀiă hĭn mkă hŏng hnơ̆ng kah knar kluôm mơ̆ng ala čar 20,27%, hlăm anăn 13 êpul êya mâo mkăp prăk ti gŭ 10%. Phung khua kiă kriê dŭm phŭn, dhar bruă gưl dlông lač: Kñăm mtrŭt mđĭ bruă mkăp prăk duh bi liê knŭk kna, brei lŏ ksiêm dlăng, bi leh klei bhiăn kơ bruă duh bi liê knŭk kna, bruă lăn ala, rŭ mdơ̆ng lehanăn hdră bhiăn djŏ tuôm, bi hrŏ klei ngă hră m’ar čiăng pral ruh mtlaih klei dleh dlan, gun kpăk, mtrŭt mđĭ bruă mkăp prăk duh bi liê knŭk kna./.

Pô mblang: H’Nêč Êñuôl