VOV4.Êđê- Aguah mbruê 21/9, ti anôk bruă knŭk kna, k’iăng Khua knŭk kna Vũ Đức Đam mâo leh mmông mă bruă hŏng Phŭn bruă mdrao mgŭn, dŭm êpul êya, knơ̆ng bruă hlăm leh anăn êngao ala čar kơ bruă hluê ngă hdră mđĭ kyar bruă mkra mjing êa drao. Phung bi ala mñă kơ knŭk kna hnưm mkra mlih klei bhiăn êa drao hluê si klei klah čŭn hlăm thŭn 2023 srăng dưi mgaih msir klei dleh dlan kơ klei bi kčah hruê mmông dưi yua êa drao, kriê dlăng ênoh êa drao. Hluê si klei hưn mơ̆ng anôk bruă kiă kriê êa drao gŭn, klei đĭ kyar kah knar mơ̆ng bruă mkra mjing êa drao mơ̆ng 10-12%. Mkra mjing êa drao hlăm ala čar mâo 46% hlăm ênoh êa drao mdrao mgŭn. Dŭm sang măi kñăm kơ bruă mkra mjing êa drao hŏng kdrăp mrâo mrang, êa drao mrâo, êa drao thơ̆ng kơ bruă mdrao mgŭn…

Huê si phung bi ala, hruê mmông êgao, hdră kiă kriê ênoh êa drao, hdră tă kơ bruă yua êa drao bi kpăk leh kơ bruă ba jao kdrăp mkra mjing êa drao mrâo. Klei duh bi liê kơ bruă ksiêm duah leh anăn mđĭ kyar knŏng ƀiă. Dŭm klei blŭ mñă kơ bruă mkra mjing êa drao čiăng kñăm kơ bruă iêo mthưr duh bi liê kơ kdrăp mkra mjing leh anăn mđĭ hnơ̆ng tŭ jăk êa drao, mkŏ mjing dŭm anôk bruă ksiêm duah vaccine, mđĭ kyar êa drao hlăm ala čar, mđĭ klei thâo ksiêm duah, bi klă êa drao.

        Pô mblang: Y-Ƀel Êban