VOV4.Êđê - Tlam mbrue (8/2), k’iăng khua knŭk kna Vũ Đức Đam, kơ’iăng khua bruă mdrơ̆ng hŏng klei ruă tưp Covid 19 kiă kriê leh klei bi kƀĭn hŏng phung khua kiă kriê phŭn bruă mdrao mgŭn, phung thơ̆ng kơ bruă mdrao mgŭn, phung khua kiă kriê dŭm alŭ wăl kơ bruă mdrơ̆ng hŏng klei tơdah mâo F0 hlăm sang hră. Hŏng mta kñăm jing mdrơ̆ng hŏng klei ruă tưp bi tŭ dưn, čuăn krĭng ti ênoh điêt tơdah ƀuh F0 hlăm sang hră, čiăng kơ sang hră ăt dôk pŏk ƀăng lehanăn hriăm hră nanao. Ti anôk bi kƀĭn hŏng phung truăn kơ bruă bi lač, khădah mâo tlŏ leh ênŭm vaccine, ƀiădah bruă răng mgang ăt jing bruă nga đăm lĕ hlăm klei amâo mâo jăk truh, dôk hyưt kơ mta kman mlih mrâo bi mtưp hŏng klei pral. Leh 20 êklăk čô hđeh hriăm hră lŏ dơ̆ng nao sang hră mơar snăn bi tĭng hĕ êlâo kơ klei hđeh srăng tưp djŏ lu klei ruă tưp Covid 19. K'iăng khua knŭk kna lŏ mñă, bruă mdrơ̆ng hŏng klei ruă tưp jing kñăm rơ̆ng kjăp klei suaih pral kơ phung hđeh, snăn mtă kơ phŭn bruă mdrao mgŭn ksiêm dlăng bi nik, lehanăn mâo hdră ktrâo atăt bi jăk hlăm bruă mdrao mgŭn hđeh tơdah djŏ kman klei ruă tưp, lehanăn ktrâo atăt anôk mdrao mgŭn hđeh êlăk hlăm djăp boh sang êa drao kluôm ala./.

Y-Khem pô mblang