VOV4.Êđê - Hruê mbruê 11/3, ti Hà Nội, phŭn bruă kahan ksiêm mkŏ mjing knăm bi hdơr 25 thŭn hruê knhuah gru kahan ksiêm mkhư̆ gang phung ngă soh kơ matuĭ (12/3/2022) leh anăn tŭ mă mêđai klei ngă bruă mrô 1. Găn hgao 20 thŭn, êpul êya kahan ksiêm gang mkhư̆ phung ngă soh kơ matuĭ ƀrư̆ hruê ƀrư̆ prŏng leh anăn đĭ kyar hlăm djăp mta bruă. Boh tŭ, mơ̆ng thŭn 1997 truh kơ ară anei, êpul êya kahan ksiêm gang mkhư̆ phung ngă soh matuĭ dưi hmao ƀuh, mă kơ̆ng êbeh 290 êbâo klei ngă soh, mă kơ̆ng êbeh 460 čô ngă soh leh anăn hrui mă êbeh 5 tôn drao phiện, giăm 82 tôn heroin, giăm 22 ton matuĭ dŭm mta, lu ngăn ndrăp mâo ênoh bi mklin hlăm ngă prăk ala čar. Blŭ hlăm knăm anăn, K’iăng Khua knŭk kna Vũ Đức Đam lač klă, bruă gang mkhư̆ klei ngă soh matuĭ amâo djŏ knŏng jing bruă klam mơ̆ng êpul kahan ksiêm, ƀiădah čiăng mâo klei nao hgŭm mơ̆ng dŭm êpul êya thơ̆ng kơ bruă, phŭn bruă, dhar bruă djŏ tuôm, wăt kơ bruă kđi čar. K’iăng Khua knŭk kna mtă, hlăm hruê mmông kơ anăp, êpul êya kahan ksiêm gang mkhư̆ klei ngă soh kơ matuĭ čiăng kñăm ngă jăk hĭn bruă đru kčĕ hŏng gưl bruă Đảng nah gŭ, bruă sang čư êa dŭm gưl mđĭ hĭn bruă gĭt gai, ktrâo lač, kñăm iêo mthưr ai dưi mơ̆ng bruă kđi čar leh anăn jih jang mnuih ƀuôn sang nao hgŭm hlăm bruă gang mkhư̆ klei ngă soh matuĭ.

Y-Ƀel pô mblang