VOV4.Êđê - Aguah mbruê 30/9, ti Hà Nội, Êpul hgŭm bruă phung mniê gưl dlông Việt Nam mkŏ mjing klei kƀĭn ksiêm wĭt 2 hdră mkăp mơ̆ng knŭk kna wưng thŭn 2017 – 2022 mâo: Hdră hâo hưn, mtô bi hriăm, mtrŭt mjhar, đru kơ phŭn mniê mgaih msir đa đa boh klei yang ƀuôn djŏ tuôm hŏng phung mniê wưng thŭn 2017 – 2027 (hdră mkăp 938) leh anăn hdră đru kơ phung mniê čô̆ kơ bruă wưng thŭn 2017 – 2025 (hdră mkăp 939). Kiăng Khua knŭk kna Vũ Đức Đam leh anăn khua gĭt gai dŭm phŭn, dhar bruă, êpul bruă gưl dlông nao hgŭm.

Hlăm klei kƀĭn, phung bi ala dŭm čar, bo kah mbha leh klei hriăm, klei bi hmô mâo boh tŭ dưn mơ̆ng dua hdră anăn dưi mkŏ mjing leh anăn pŏk phai msĕ si: Klei bi hmô mkra mjing doh – ba yua doh, klei bi hmô gang mkhư̆ klei amâo mâo jăk hlăm gŏ sang, klei bi hmô čô kơ bruă tŭ jing mơ̆ng phung mniê. Mbĭt anăn hưn mdah dŭm hdră êlan hluê ngă 2 hdră anăn jăk hĭn hlăm wưng kơ anăp. K’iăng Khua knŭk kna Vũ Đức Đam lač, hdră dưn yua kdrăp mrâo mrang čiăng kah mbha klei thâo truh kơ phung mniê, dŭm gưl bruă čiăng mđing kơ phung mniê dleh dlan, krĭng tiah kbưi, rơ̆ng kơ diñu dưi thâo klă mtă phŭn klei hâo hưn.

Y-Ƀel pô mblang