VOV4.Êđê- Klei bi lông bi ruê̆ klei hriăm gưl 3 thŭn 2022 jing klei bi lông mâo knŭk kna uêñ mĭn êdi. Ti aguah mbruê 7/7, K’iăng Khua knŭk kna Vũ Đức Đam nao ksiêm dlăng anôk bi lông ti sang hră gưl 2 Nghĩa Tân, kdriêk čar Cầu Giấy, ƀuôn prŏng Hà Nội, mđĭ ai phung hđeh bi lông leh anăn phung amĭ ama. Leh phung hđeh kbiă mơ̆ng adŭ bi lông mta hriăm Ngữ Văn, k’iăng Khua knŭk kna Vũ Đức Đam mâo mtam klei êmuh čuă leh anăn mđĭ ai phung hđeh sang hră leh anăn klei găl adŭ bi lông, hnơ̆ng klei bi lông… k’iăng Khua knŭk kna yap yuôm bhăn bruă mkŏ mjing klei bi lông bi ruê̆ klei hriăm gưl tlâo thŭn 2022 mơ̆ng ƀuôn prŏng Hà Nội leh anăn dŭm alŭ wăl hlăm kluôm ala, k’iăng Khua knŭk kna Vũ Đức Đam mñă klă, bruă hluê ngă dŭm hdră bhiăn hlăm klei bi lông jing ktang phĭy, mbĭt anăn mkŏ mjing klei găl jih hnơ̆ng kơ phung hđeh bi lông. Boh nik hŏng phung hđeh nao êla amâodah ngă soh hŏng hdră bhiăn bi lông čiăng ksiêm dlăng klă nik, čiăng kơ phung hđeh bi lông amâo mâo luč klei tŭ kyua dŭm bruă ngă amâo mâo năng amâodah tăp tuôm hĕ.

Pô mblang: Y-Ƀel Êban