VOV4.Êđê- Aguah hruê 24/3, ti Hà Nội, K’iăng khua knŭk kna Vũ Đức Đam nao lehanăn blŭ hrăm ti Klei bi kƀĭn kluôm ala Dhar bruă ala čar kơ bruă Êdam êra Việt Nam tal sa. Blŭ hrăm ti knăm anei, K’iăng khua knŭk kna Vũ Đức Đam mñă klă: Ară anei, phung êdam êra ka bŏ 18 thŭn mâo leh klei thâo hlăm yang ƀuôn, thâo hlăm lu mta bruă mkă hŏng ênuk gưl êlâo.

Anei jing sa hlăm dŭm klei lông dlăng kơ Dhar bruă ala čar kơ bruă êdam êra Việt Nam. K’iăng khua knŭk kna Vũ Đức Đam mtă, hlăm wưng ti anăp Dhar bruă lehanăn bruă Đoàn gưl dlông brei mâo klei thâo săng klă klơ̆ng, čih mkra hdră mă bruă kñăm mtrŭt mđĭ klei mĭn mrâo mơ̆ng phung êdam êra Việt Nam hlăm wưng mrâo. Mñă klă klei mđing mơ̆ng Knŭk kna lehanăn Khua knŭk kna hŏng bruă êdam êra Việt Nam, K’iăng khua knŭk kna Vũ Đức Đam mtă kơ dŭm Phŭn, dhar bruă djŏ tuôm brei bi hgŭm kjăp hĭn hŏng Dhar bruă ala čar kơ bruă êdam êra Việt Nam lehanăn bruă Đoàn gưl dlông kñăm pŏk ngă dŭm bruă klă klơ̆ng, hluê djŏ si klei kčah mtrŭn mơ̆ng knŭk kna./.

Pô mblang: Y-Khem Niê