VOV4.Êđê- K’iăng Khua lăn čar Võ Thị Ánh Xuân myơr leh mnga, brui mngưi bi hdơr kơ khua gĭt gai Hồ Chí Minh ti wăl knhuah gru ala čar Kim Liên, kdriêk Nam Đàn, čar Nghệ An. Hlăm ai êwa kdrưh kơăm, hŏng klei mpŭ,  K’iăng Khua lăn čar Võ Thị Ánh Xuân myơr mbĭt hŏng êpul ngă bruă myơr leh mnga, brui mngưi, bi hdơr, bi êdah klei mpŭ, klei hdơr knga nanao hŏng khua gĭt gai Hồ Chí Minh, jing khua gĭt gai mơ̆ng Đảng leh anăn mnuih ƀuôn sang Việt Nam, pô jhŏng ktang sua wĭt klei êngiê kơ djuê ana, jing pô kdlưn hĭn, đru mguôp yuôm bhăn hlăm bruă sua wĭt klei êngiê djuê ana kyua klei êđăp ênang leh anăn hơuh mđao mnuih djuê ana Việt Nam leh anăn mnuih ƀuôn sang tar rŏng lăn. Čih hlăm hră kñĭ bi hdơr ti wăl knhuah gru Kim Liên, K’iăng Khua lăn čar Võ Thị Ánh Xuân čih: “Mpŭ leh anăn hdơr kơ Awa, phung hmei srăng jih klei hdĭp tui hriăm leh anăn hluê ngă msĕ si klei mĭn, knhuah hdĭp Hồ Chí Minh, gĭr ktưn hrăm mbĭt, sa ai mkŏ mjing Đảng klă mngač, kjăp ktang, đru mkŏ mjing ala čar ƀrư̆ hruê brư̆ mdŏng sah, mrâo mrang, mnuih ƀuôn sang trei mđao.”

Pô mblang: Y-Ƀel Êban