VOV4.Êđê- Tlam 7/4, Khua Anôk bruă Đảng gưl dlông, K’iăng Khua lăn čar Võ Thị Ánh Xuân hŏng êpul mă bruă nao čhưn leh anăn mđup brei mnơ̆ng kơ dŭm gŏ sang knŭk kna dlăng ba ti kdriêk Lạc Dương, čar Lâm Đồng.

K’iăng Khua lăn čar Võ Thị Ánh Xuân mđup brei 30 hnư mnơ̆ng kơ dŭm gŏ sang knŭk kna dlăng ba ti kdriêk Lạc Dương

Leh hmư̆ klei hâo hưn kơ boh klei mđĭ kyar bruă duh mkra ala ƀuôn ti alŭ wăl, K’iăng Khua lăn čar Võ Thị Ánh Xuân čih yap leh anăn bi mni kơ klei tŭ kdriêk Lạc Dương mâo leh hlăm wưng êgao, čang hmăng kdriêk Lạc Dương lŏ dơ̆ng mdĭ lar klei găl, klei mâo mơ̆ng pô, hlue ngă tŭ dưn hdră mlih mrâo ana pla mjing, ba yua kdrăp mrâo leh anăn pla mjing lŏ hma, mđĭ hnơ̆ng jăk leh anăn ênoh yuôm mnơ̆ng dhơ̆ng lŏ hma hlăm sa ênhă pla mjing.

Mđup brei hră bi hmô 10 boh sang klei khăp kơ kdriêk Lạc Dương, čar Lâm Đồng

Gưl anei, K’iăng khua lăn čar mđup brei leh 30 hnư mnơ̆ng kơ dŭm gŏ sang knŭk kna dlăng ba, mđup brei hră bi hmô kơ 10 gŏ sang klei khăp ti kdriêk Lạc Dương. K’iăng Khua lăn čar Võ Thị Ánh Xuân ăt nao čhưn dŭm gru hmô mkra mjing ba yua kdrăp mrâo ti wăl krah Lạc Dương, kdriêk Lạc Dương, čar Lâm Đồng.

Pô mblang: H’Zawut Ƀuôn Yă