VOV4.Êđê- Hmư̆ asăp jak iêô mơ̆ng K’iăng Khua lăn čar Võ Thị Ánh Xuân, Bounthong Chitmany, Khua hlăm Phŭn bruă kđi čar, Khua Anôk dlăng Đảng yang ƀuôn krŭ kdơ̆ng Lao, K’iăng khua lăn čar Lao hriê čhưn tiViệt Nam, mơ̆ng hruê 17-19/7/2022. Tlam 17/7, leh Knăm drông klă sĭt, K’iăng Khua lăn čar Võ Thị Ánh Xuân bi trông leh hŏng Bounthong Chitmany ti anôk bruă khua lăn čar. Bi trông kơ hdră tă mđĭ klei bi hgŭm dua nah hlăm wưng kơ anăp, dua K’iăng Khua lăn čar bi tŭ ư lŏ dơ̆ng mđĭ gưl nao čhưn, bi tuôm gưl dlông hlăm jih jang hdră; mkŏ mjing jăk dŭm bruă yuôm bhăn leh anăn klă sĭt hlăm Thŭn bi hgŭm Việt Nam - Lào, Lào - Việt Nam 2022;  bi hgŭm pŏk ngă jăk leh anăn tŭ dưn dŭm klei kuôl kă gưl dlông.

Dua tĭng bi mklă lŏ dơ̆ng gĭr ktưn hŏng dŭm ala čar amâo mdei mđĭ klei bi hgŭm leh anăn bruă klam mơ̆ng ASEAN, krơ̆ng kjăp dŭm klei bhiăn, ênoh yuôm, klei mĭn mbĭt kơ dŭm bruă djŏ tuôm kơ klei êđăp ênang krĭng wăl, bi tŭ ư klei mĭn msir mgaih dŭm bruă hlăm krĭng wăl leh anăn dlông rŏng lăn hŏng hdră êđăp ênang hŏng klei tur knơ̆ng mpŭ kơ hdră bhiăn lu ala čar./.

Pô mblang: H’Zawut Ƀuôn Yă