VOV4.Êđê-  Hlăm bruă nao ti anôk bi kƀĭn gưl dlông Mniê tar rŏng lăn thŭn 2022 (GSW 2022) ti Thailand, k’iăng khua lăn čar Võ Thị Ánh Xuân nao čuă lehanăn mă leh bruă ti čar Udon Thani bi tuôm hŏng phung ƀuôn sang Việt Nam hdĭp kơ anăn, lehanăn nao čuă sang hră Khánh An. Ti anôk bi tuôm, leh hmư̆ klei hâo mdah mơ̆ng phung ƀuôn sang Việt Nam ti Thailand, k’iăng khua lăn čar mgei ai tiê ƀuh klei hdĭp phung ƀuôn sang pô, bi mni kơ klei thâo bi mguôp, thâo bi đru hdơ̆ng găp, lehanăn wir nanao ai tiê kơ lăn čar. K’iăng khua lăn čar hâo hưn leh klah čŭn kơ bruă duh mkra hlăm lăn čar hŏng dŭm klei bi knăl jing jăk siam, hlăk ƀrư̆ ƀrư̆ kơrŭ wĭt bruă duh mkra leh găn klei ruă tưp Covid 19, bi klă Đảng, lehanăn Knŭk kna mâo nanao klei mđing êdi hŏng phung ƀuôn sang pô ti ala tač êngao, hlăm anăn mâo mnuih Việt Nam drei hdĭp kơ Thailand, čang hmăng kơ êpul hgŭm jih jang mnuih Việt Nam hdĭp ti Thailand đru kčĕ nanao kơ phung ƀuôn sang pô hdĭp hlăm klei thâo bi mguôp, mtô bi hriăm anak aneh pô hriăm klei yuăn, wir phă lăn čar./.

         Pô mblang: Y-Khem Niê