VOV4.Êđê- Ƀri bi hdơr 75 thŭn hrue phung kahan êka êkeh, phung êngiă asei (27/7), aguah mbrue (6/7), ti anôk bruă khua lăn čar, K’iăng khua lăn čar Võ Thị Ánh Xuân bi tuôm leh hŏng êpul bi ala mnuih mâo bruă tŭ dưn čar Bắc Cạn. Bi blŭ hrăm hŏng phung bi ala, K’iăng khua lăn čar Võ Thị Ánh Xuân bi myuôm čar Bắc Cạn khădah dôk tuôm hŏng lu klei dleh dlan ƀiădah ăt ngă jăk bruă hdơr knga tla ai, đru dlăng ba mnuih mâo bruă tŭ dưn hlăm alŭ wăl pô.

 K’iăng khua lăn čar mtă kơ čar Bắc Cạn lŏ dơ̆ng mđĭ hĭn boh tŭ dưn mâo ngă leh, jih ai tiê lŏ hâo hưn, mjuăt bi hriăm ai tiê thâo khăp kơ lăn čar mơ̆ng phung ƀuôn sang kơ bruă răng mgang lăn čar, hdơr knga kơ phung mâo bruă tŭ dưn atăt lăn čar hlăm wưng ară anei, ksiêm dlăng klei hdĭp mnuih mâo bruă tŭ dưn, dlăng kriê klei suaih pral, lehanăn mâo klei akâo kơ gưl dlông, đru kơ mnuih mâo bruă tŭ dưn bi pral./.

Pô mblang: Y-Khem Niê