VOV4.Êđê - Hrue mbrue (7/6), ti anôk bruă khua lăn čar, k’iăng khua lăn čar Võ Thị Ánh Xuân drông čhưn leh hŏng êpul khua bi ala phung mâo bruă tŭ dưn mơ̆ng čar Đồng Nai, ƀri êpul nao čhưn kơ ƀuôn prŏng phŭn Hà Nội lehanăn nao čuă msat khua gĭt gai Hồ Chí Minh. Čar Đồng Nai ară anei mâo êbeh 52 êbâo čô mnuih mâo bruă tŭ dưn hŏng cách mạng lehanăn găp djuê mnuih mâo bruă tŭ dưn. Hlăm anăn mâo truh 1 êbâo 141 čô amĭ Việt Nam jhŏng ktang. Blŭ hrăm hŏng êpul bi ala mnuih mâo bruă tŭ dưn hŏng cách mạng čar Đồng Nai, K’iăng khua lăn čar bi mni kơ dŭm klei gĭr mơ̆ng čar Đồng Nai hlăm bruă đru ba mnuih mâo bruă tŭ dưn, mtă kơ čar Đồng Nai lŏ dơ̆ng iêo jak jih yang ƀuôn bi hgŭm đru kơ mnuih mâo bruă tŭ dưn kơ klei hdĭp lehanăn ai tiê, boh nik đru mdơ̆ng brei sang dôk kơ digơ̆. K'iăng khua lăn čar ăt čang hmăng kơ phung mâo bruă tŭ dưn hŏng cách mạng lŏ dơ̆ng mđĭ hĭn ai tiê thâo khăp kơ lăn čar, bi hâo hưn kơ phung ƀuôn sang hlue gưt hdră êlan mơ̆ng Đảng klei bhiăn knŭk kna, rŭ mdơ̆ng ƀuôn sang pô mdrŏng sah kjăp siam./.

Y-Khem pô mblang