VOV4.Êđê- Ƀri gưl bi hdơr 75 thŭn hruê phung kahan êka êkeh, êngiă asei, aguah 25/7, ti Anôk bruă khua lăn čar, K’iăng Khua lăn čar Võ Thị Ánh Xuân drông êpul bi ala Êpul hgŭm kahan mniê Duôr Čư̆ Prŏng - êlan Hồ Chí Minh. K’iăng Khua lăn čar Võ Thị Ánh Xuân bi êdah klei mơak leh dưi bi tuôm hŏng phung kahan mniê Duôr čư̆ prŏng; K’iăng Khua lăn čar čih yap leh anăn bi mni klei đru mguôp leh anăn dŭm klei tŭ êdah kdlưn mơ̆ng phung kahan mniê Duôr Čư̆ Prŏng hlăm klei bi blah bi kdơ̆ng hŏng Mi, mtlaih ala čar. Bi mklă, klei săn asei mơ̆ng phung kahan mniê Duôr Čư̆ Prŏng đru mguôp prŏng prĭn hŏng djuê ana mjing klei tŭ dưn kdrưh kơăm. Rup phung kahan mniê jing klei bi hmô mngač kơ phung mda asei hruê anei tui hriăm. K’iăng Khua lăn čar čang hmăng phung kahan mniê Duôr Čư̆ Prŏng lŏ dơ̆ng ngă pô hưn bi sĭt hƀuê hnuk bi hriăm anak čô, phung mda asei, amai adei mniê ti alŭ wăl, anôk bruă bi hgŭm, bi lông mkra mjing, tui hriăm, mkŏ mjing klei hdĭp mrâo./.

Pô mblang: H’Zawut Ƀuôn Yă