VOV4.Êđê- Mđing truh Knăm bi hdơr 75 thŭn Hruê kahan êka êkeh – Djiê êngiă (27/7/1947 - 27/7/2022), aguah 10/6, ti Adŭ bruă Khua lăn čar, K’iăng khua lăn čar Võ Thị Ánh Xuân drông leh Êpul mnuih mâo bruă tŭ dưn čar Dak Nông ƀri êpul nao čhưn ti ƀuôn prŏng phŭn Hà Nội lehanăn nao čuă msat Awa. Ară anei, čar Dak Nông mâo êbeh 13 êbâo čô mnuih knŭk kna dlăng ba, hlăm ênoh anăn dưi dưn klei đru hlăm grăp mlan mâo giăm 3 êbâo čô. Mbĭt hŏng hdră mtrŭn jăk găl mơ̆ng Đảng lehanăn Knŭk kna, hdră bruă jih jang mnuih ƀuôn sang đru dlăng kriê phung kahan êka êkeh, kahan ruă duam, gŏ sang djiê êngiă lehanăn mnuih mâo bruă tŭ dưn hŏng cách mạng mơ̆ng čar ba wĭt leh klei tŭ dưn, dưi mđĭ lar ai ktang jih jang mnuih ƀuôn sang nao hgŭm.

Dlăng kluôm klei hdĭp mnuih knŭk kna dlăng ba hlăm alŭ wăl čar h’ĭt kjăp. Blŭ hrăm hŏng êpul bi ala mnuih mâo bruă tŭ dưn hŏng cách mạng čar Dak Nông, K’iăng khua lăn čar Võ Thị Ánh Xuân bi êdah klei lač jăk hŏng mnuih mâo bruă tŭ dưn mơ̆ng čar Dak Nông, čang hmăng kơ čar mđĭ lar knhuah gru hgŭm mguôp, khăp kơ lăn čar mơ̆ng mnuih ƀuôn sang dŭm djuê ana krĭng lăn dap kngư, mkŏ mkra ƀuôn sang, lăn čar jăk siam, hluê ngă jăk 2 bruă klam mkŏ mkra lehanăn răng mgang ala čar, mbĭt anăn lŏ dơ̆ng mđing hluê ngă jăk hdră mtrŭn kơ mnuih mâo bruă tŭ dưn, čiăng mjuăt bi hriăm klei khăp kơ ala čar, klei bhiăn mơ̆ng djuê ana hŏng yang ƀuôn./.

                                                    Pô mblang: H’Nêč Êñuôl