VOV4.Êđê- Tlam mbruê 1/4, K’iăng Khua lăn čar Võ Thị Ánh Xuân nao čuă leh anăn mă bruă ti kđông kahan knông lăn Gành Dầu, să Gành Dầu, ƀuôn prŏng Phú Quốc, čar Kiên Giang. Kđông kahan knông dlăng Gành Dầu kriê dlăng êlan hang êa ksĭ mâo boh tiah 33km. Hlăm krĭng ksĭ kriê dlăng mâo 3 plao ksĭ jing Hòn Bàng, Hòn Thầy Bói, Hòn Móng Tay. Thŭn 2021, kđông kahan Gành Dầu găn hgao leh klei dleh dlan čiăng bi leh bruă klam mdua, gang mkhư̆ klei ruă tưp, gang mkhư̆ dŭm mta phung ngă soh leh anăn čung ba mnuih ƀuôn sang mă kan hdang hluê ngă djŏ klei bhiăn ala čar, răng mgang plao ksĭ…

K’iăng Khua lăn čar yap yuôm bhăn leh anăn pah mni ai tiê bi mguôp, tŭ klei dleh dlan čiăng bi leh bruă klam mơ̆ng phung knuă druh, lĭng kahan kđông kahan knông lăn Gành Dầu. Mbĭt anăn mtă kơ anôk bruă lŏ uêñ mĭn hĭn kơ bruă mkŏ mjing Đảng ciăng ngă jăk bruă klei mĭn kđi čar leh anăn kriê dlăng phung knuă druh, mkŏ mjing êpul êya kjăp ktang kluôm ênŭm, boh nik jing phung knuă druh gĭt gai mâo klei thâo, klei kjăp hlăm bruă kđi čar leh anăn mâo klei bi hmô.

Pô mblang: Y-Khem Niê