VOV4.Êđê- Mmăt 31.7, ti čar Hoà Bình mkŏ mjing Hdră kdŏ mmuiñ “Hoà Bình - Asăp kwang krĭng Mường” tŭ mă Hră tŭ yap 2 hră tŭ yap mnơ̆ng kriê pioh dhar kreh amâo êdah klă ala čar:  Klei thâo djuê ana Lịch tre leh anăn Knăm mơak djuê ana Khai Hạ mơ̆ng djuê ana Mường čar Hoà Bình. Nao hlăm knăm mâo K’iăng Khua lăn čar Võ Thị Ánh Xuân hŏng khua gĭt gai dŭm anôk, dhar bruă gưl dlông. K’iăng Khua lăn čar lač, hŏng hƀuê ênuk hdĭp mda sui thŭn ti Hoà Bình, mnuih Mường mjing leh lu mnơ̆ng dhar kreh êdah klă leh anăn amâo êdah klă jăk siam, đru bi mđĭ thiăm hjiê dhar kreh mơ̆ng 54 djuê ana ayŏng adei.

Hlăm anăn klei thâo djuê ana Lịch tre leh anăn knăm mơak djuê ana Khai Hạ dưi tŭ yap mnơ̆ng kriê pioh dhar kreh amâo êdah klă ala čar mguôp hŏng bruă pla mjing mdiê lŏ. K’iăng Khua lăn čar bi mklă, dŭm ênoh yuôm dhar kreh jăk siam anei jing klei bi mguôp êpul êya, đru kơ mnuih ƀuôn sang ti lăn anei hgao klei dleh dlan, lông dlăng čiăng gĭr ktưn, mkŏ mjing leh anăn mđĭ kyar ƀuôn sang ƀrư̆ mdrŏng sah jăk siam./.

Pô mblang: H’Zawut Ƀuôn Yă