Bi ala kơ Knŭk kna leh anăn Êpul gơ̆ng bi long ktưn pah mni Gưl dlông, K’iăng Khua lăn čar Võ Thị Ánh Xuân bi mni kơ klei tŭ yuôm bhăn bruă Đảng, bruă sang čư̆ êa leh anăn mnuih ƀuôn sang čar Thanh Hóa mâo leh hlăm wưng êgao. Mbĭt anăn mñă klă, čar Thanh Hóa dôk ti anăp klei găl prŏng čiăng jing čar ba anăp, čar bi hmô kluôm ala, mđing kơ čar mdrŏng sah, jăk mơak hlăm thŭn 2045 msĕ si klei Đảng leh anăn Knŭk kna čang hmăng, hdră kñăm Klei bi kƀĭn bruă Đảng čar Thanh Hóa tal XX kčah leh.

Čiăng dưi ngă klei anei, brei Đảng, knŭk kna, lĭng kahan leh anăn mnuih ƀuôn sang čar Thanh Hóa mđĭ lar knhuah gru jhŏng ktang leh anăn boh tŭ mâo leh; msir mgaih klei kƀah, mă klei hriăm êlam hlăm bruă mkŏ mjing Đảng, mkŏ mjing bruă kđi čar, hlăm bruă kriê dlăng knŭk kna hlăm bruă dleh dlan, găn klei lông dlăng, hrăm mbĭt ba Thanh Hóa lŏ dơ̆ng đĭ kyar pral leh anăn kjăp.