VOV4.Êđê -  Aguah 21/7, K’iăng Khua lăn čar Võ Thị Ánh Xuân nao hlăm klei bi tuôm hŏng mniê lĭng kahan krŭ kdơ̆ng mâo phung roh mă kơ̆ng ênuk bi blah bi kdơ̆ng hŏng Mi ƀri bi hdơr 75 thŭn hruê phung kahan êka êkeh êngiă asei ti ƀuôn prŏng Hồ Chí Minh. Hlăm 2 êtuh čô bi ala kơ êbeh 600 čô mniê lĭng kahan krŭ kdơ̆ng ti ƀuôn prŏng Hồ Chí Minh, wăt mâo phung khua thŭn leh ƀiădah ăt lŏ dơ̆ng jing phung ƀuôn sang bi hmô, duh myơr mkŏ mjing ƀuôn prŏng lăn čar. Anei ăt jing mmông bi tuôm tal êlâo mơ̆ng phung mniê krŭ kdơ̆ng mâo roh mă kơ̆ng, krư̆ kđăl hlăm ênuk bi kdơ̆ng hŏng Mi. K’iăng Khua lăn čar čar bi ala kơ Đảng, knŭk kna bi êdah klei mpŭ hdơr knga kơ klei săn asei, duh myơr prŏng prĭn phung amĭ, phung amai tuôm hŏng roh mă kơ̆ng hlăm ênuk bi blah, mñă klă, grăp čô knuă druh, đảng viên hruê anei brei hriăm mjuăt knhuah gru, klei thâo msĕ si phung lĭng kahan krŭ kdơ̆ng thŭn êlâo, ba lăn čar đĭ kyar pral leh anăn hơĭt kjăp, hdơr knga kơ ênuk ba anăp duh myơr leh kơ klei êngiê lăn čar./.

H’ Zawut pô mblang