VOV4.Êđê- Aguah 29/7, ti Anôk bruă Knŭk kna, Anôk bruă gĭt gai ksiêm wĭt bruă hlue ngă Hdră bhiăn lăn ala leh anăn čih mkra Hdră bhiăn lăn ala (Lŏ mlih mrâo) mkŏ mjing klei kƀĭn tal sa. K’iăng Khua Knŭk kna Lê Văn Thành, Khua Anôk bruă gĭt gai Klei bi kƀĭn. Hlue si Phŭn bruă ngăn dŏ wăl hdĭp mda, leh êbeh 8 thŭn mkŏ mjing Hlue ngă Hdră bhiăn lăn ala, bruă kriê dlăng lăn ala dưi mâo klei tŭ dưn yuôm bhăn. Khădah hlăm klei hlue ngă hdră bhiăn ăt adôk mâo klei êdu kƀah, mkhư̆ msĕ si: Kčah ka rơ̆ng klei kluôm ênŭm, bi tŭ ư leh anăn mđrăm mbĭt; Bruă hrui mă lăn, tla hnô, đru, lŏ mkŏ mjing anôk dôk adôk mâo anôk ka rơ̆ng klei tŭ dưn kơ mnuih ƀuôn sang; Klei bi mmiă, kčŭt hưn leh anăn ngă soh hdră bhiăn kơ lăn ala dôk dleh ktuê dlăng… Kyua anăn bruă mkŏ mjing hră čih Hdră bhiăn lăn ala (Lŏ mlih mrâo) jing čiăng snăk. Klah čŭn klei bi kƀĭn, K’iăng Khua knŭk kna Lê Văn Thành mtă kơ Anôk čih mkra Hdră bhiăn lăn ala (lŏ mlih mrâo) brei ktuê dlăng Hdră mtrŭn mrô 18 mơ̆ng Klei bi kƀĭn tal êma, Anôk bruă Đảng gưl dlông tal 13 čiăng rơ̆ng mđĭ klei tŭ dưn kriê dlăng leh anăn ba yua lăn ala, mjing boh kdrŭt ba lăn čar drei jing ala čar đĭ kyar mâo prăk hrui wĭt lu./.

Pô mblang: H’Zawut Ƀuôn Yă