VOV4.Êđê- Aguah mbruê, ti Hà Nội mkŏ mjing klei bi kƀĭn kluôm  Êpul hgŭm phung mnia mblei mda asei Việt Nam tal 7, wưng thŭn 2022 -2025 hŏng akŏ “Ba anăp mlih mrâo – mrâo mrang ênoh yuôm”. Klei bi kƀĭn phung duh mkra mda asei Việt Nam mđĭ kyar leh ti 63 čar, ƀuôn prŏng, hŏng 11 êbâo čô. Dŭm anôk bruă duh mkra hlăm mda asei dôk mjing bruă mă kơ 3 êklăk čô mnuih hŏng ênoh hrui wĭt grăp thŭn mâo êbeh 30 êklai USD. Klei bi kƀĭn bi kuôl kă ruah 153 čô nao hlăm Dhar bruă gưl dlông Êpul hgŭm phung duh mkra mda asei Việt Nam gưl 7.

Nao leh anăn blŭ hrăm gĭt gai hlăm klei bi kƀĭn, K’iăng Khua knŭk kna Lê Minh Khái bi mni kơ klei tŭ dưn, đru mguôp yuôm bhăn mơ̆ng êpul duh mkra mda asei leh anăn Êpul hgŭm phung duh mkra mda asei Việt Nam hlăm wưng êgao. Wưng kơ anăp, Êpul hgŭm phung duh mkra mda asei Việt Nam brei klă sĭt jing boh sang mbĭt, bi kƀĭn, bi hgŭm êpul duh mkra mda asei, răng mgang klei dưi djŏ klă, djŏ hdră bhiăn kơ phung duh mkra mda asei. Bi lu jơr dŭm hdră ngă bruă, mđĭ klei bi hgŭm, mđĭ kyar anôk ba čhĭ kah mbha klei hâo hưn, mđĭ klei dưi mơ̆ng phung hgŭm./.

Pô mblang: H’Zawut Ƀuôn Yă