Aguah mbrue 10/5, ti Labuan Bajo, Indonesia, Khua knŭk kna Phạm Minh Chính lehanăn khua êpul dŭm ala čar ASEAN nao leh ti anôk pŏk klei bi kƀĭn gưl dlông ASEAN tal 42. Pŏk klei bi kƀĭn anei, Khua mil čhil Indonesia, Joko Widodo bi myuôm klei bi kƀĭn gưl dlông ASEAN tal anei mâo mkŏ mjing êjai klei duh mkra dlông rŏng lăn ka mâo klei lŏ kơrŭ wĭt sĭt êmĭt ôh, klei bi ktưn plah wah dŭm ala čar prŏng dôk mâo lu klei ka thâo bi djŏ, dleh dưi tĭng mkă.

Khua mil čhil Indonesia đăo knang, klei bi mguôp lehanăn klei thâo gĭr mơ̆ng dŭm ala čar hgŭm ASEAN jing hdră êlan phŭn čiăng kơ ASEAN dưn yua jih klei ktang pô, lehanăn đru čung klei êđăp ênang lehanăn đĭ kyar hlăm alŭ wăl. Khua knŭk kna Phạm Minh Chính hơêč hmưi khua mil čhil Joko Widodo lehanăn lăn čar Indonesia klam bruă jing khua kiă kriê ASEAN 2023. Khua knŭk kna mñă klei bi mguôp yơh jing klei ktang lehanăn brei mâo bruă ngă klă. Bi kjăp klei bi mguôp, lehanăn bi sa ai jing bruă čuăn kơ sa ASEAN hnŭk êngiê lehanăn čŏng mđĭ kyar./.