VOV4.Êđê - Kñăm tui duah dŭm hdră msir mđĭ kyar tŭ dưn klei găl mâo kơ hdră mđĭ kyar bruă hiu čhưn ênguê Kon Tum lehanăn mơ̆ng kluôm krĭng Lăn dap kngư, ti ƀuôn prŏng Kon Tum hlăm hruê kăm êgao, Phŭn bruă Dhar kreh mjuăt ktang asei mlei bi hgŭm hŏng Anôk bruă sang čư̆ êa čar Kon Tum mkŏ mjing Klei bi kƀĭn trông “Hiu čhưn ênguê Kon Tum – Klei găl mâo lehanăn klei đĭ kyar”.

Klei bi kƀĭn “Hiu čhưn ênguê Kon Tum- Klei găl leh anăn klei čang hmăng” thŭn 2022 iêô jak klei hgŭm mơ̆ng 500 čô bi ala jing phung kriê dlăng, phung thơ̆ng kơ bruă; Êpul hgŭm, êpul grŭp duh mkra hiu čhưn ênguê, sang jưh, dŭ mdiăng, phung bi ala hriê mơ̆ng dŭm čar Dhŭng Lao, Ngŏ Dưr Campuchia mâo êlan knông lăn mbĭt hŏng čar Kon Tum.

Blŭ hrăm hlăm klei bi kƀĭn, Khua phŭn bruă Dhar kreh, mjuăt ktang asei mlei leh anăn hiu čhưn ênguê Nguyễn Văn Hùng bi mklă, Phŭn bruă leh anăn dŭm alŭ wăl hlăm kluôm ala dôk mâo lu hdră msir, klei gĭr mkŏ mjing dŭm bruă ngă čiăng kơrŭ wĭt bruă hiu čhưn ênguê leh klei ruă Covid-19. Klei bi kƀĭn “Hiu čhưn ênguê Kon Tum- Klei găl leh anăn klei čang hmăng” jing klei găl kơ anôk bruă duh mkra bi tuôm, mjĕ êrô, bi klă klei bi hgŭm hlăm bruă hiu čhưn ênguê. Hlue si Khua phŭn bruă, čar Kon Tum mâo leh dua mta yuôm bhăn čiăng mđĭ kyar hiu čhưn ênguê: “Hmei ƀuh mâo dua klei klă klơ̆ng Kon Tum ngă leh anăn mâo čiăng drei mđĭ kyar bruă hiu čhưn ênguê. Klei tal sa anăn jing Kon Tum mâo djăp klei găl čiăng kơ bruă ngăn dŏ wăl hdĭp mda leh anăn dhar kreh čiăng ngă bruă hiu čhưn ênguê msĕ si čar mkăn. Klei tal dua, anak mnuih Kon Tum hŏng knhuah kpă ênuah, kreh kriăng mkra mjing leh anăn bŏ hŏng klei khăp. Diñu pô jing phung iêo jak phung hiu čhưn ênguê.”

Hlăm klei bi kƀĭn, phung bi ala bi trông leh, bi mklă klei găl leh anăn klei čang hmăng mđĭ kyar bruă hiu čhưn ênguê čar Kon Tum hŏng klei êdah kdlưn jing knhuah dhar kreh mdê hjăn, lu anôk jăk siam, msĕ si: čư̆ Ngọc Linh hlăm Wăl răng mgang dliê kmrơ̆ng Ngọc Linh, êlan ktlah mtlâo knông lăn Việt Nam- Lào- Campuchia; wăl hiu čhưn ênguê ala čar Măng Đen- Kon Plông… Khădah čiăng dưi mđĭ kyar bruă hiu čhưn ênguê, hlue si K’iăng Nai prŏng, nai prĭn Trần Đình Nguyên, pô thơ̆ng kơ bruă duh mkra, Khua hđăp Anôk bruă duh mkra Việt Nam snăn hŏng bruă răng mgang, kriê pioh mnơ̆ng yuôm bhăn, mđĭ hnơ̆ng mnơ̆ng dhơ̆ng, brei Kon Tum bi mklă phŭn đĭ kyar čiăng mđing tal êlâo kơ hdră mđĭ kyar bruă hiu čhưn ênguê: “Brei Kon Tum mkŏ čiăng mâo klei bi hgŭm. Tinăn msĕ si ti Bờ Y. čiăng kơ Bờ Y đĭ kyar snăn brei Bờ Y mkŏ truh kơ Lao, Campuchia djŏ hdră pŏk mlar ñŭ kma. Hlăk anăn Bờ Y mjing klei găl ti alŭ wăl jing klei tŭ dưn kơ pô mđĭ kyar hiu čhưn ênguê. Brei kƀĭn hdră êlan leh anăn klei găl kơ dŭm anôk mđing tal êlâo jing thâo kƀĭn hlăm dŭm anôk đĭ kyar. Sa jing ƀuôn prŏng Kon Tum, dua jing Măng Đen leh anăn tal tlâo jing mâo sa êlan atăt truh kơ êlan ktlah mtlâo knông lăn”.

Klă sĭt tlă anăp hŏng klei amâo jăk ƀiădah amâo bi luič ôh klei čang hmăng, Trần Nguyện, Khua Anôk bruă duh mkra êpul grup Sun Group lač, hlăm bruă hiu čhưn ênguê čar Kon Tum leh anăn Lăn Dap Kngư mâo lu klei êdu kƀah leh anăn kƀah lu mta klei, msĕ anôk bruă nah gŭ; kƀah phung duh bi liê prŏng; Bruă tă hdră čuăl mkă; Mkhư̆ kơ klei thâo ngă bruă hlăm hdră hiu čhưn ênguê… Leh anăn tơdah čiăng mđĭ kyar hiu čhưn ênguê brei dưi msir mgaih klei lông dlăng anei. “Anei jing dŭm klei phŭn. Tơdah čiăng mđĭ kyar brei msir mgaih klei lông dlăng anei leh anăn hmei ăt čang hmăng hŏng klei blŭ mguôp mơ̆ng hmei leh anăn klei hrăm mbĭt mơ̆ng dŭm anôk bruă duh mkra mkăn ăt srăng đru mguôp klei blŭ kơ anôk truh ti Kon Tum ƀrư̆ ƀrư̆ dưi msir mgaih dŭm klei lông dlăng leh anăn hmei srăng hmao pai mă klei, nao êdei ƀiădah srăng đĭ kyar pral.”

Hlăm Klei bi kƀĭn “Hiu čhưn ênguê Kon Tum- Klei găl leh anăn klei čang hmăng “thŭn 2022, Phŭn bruă dhar bruă, mjuăt ktang asei mlei leh anăn hiu čhưn ênguê hưn mdah Hdră kčah mđĭ kyar hiu čhưn ênguê krĭng wăl Tlâo kiêng đĭ kyar Campuchia- Lào- Việt Nam wưng thŭn 2021-2025, hnơ̆ng trah dlăng truh thŭn 2030; Knơ̆ng bruă dhar kreh, mjuăt ktang asei mlei leh anăn hiu čhưn ênguê čar Kon Tum hưn mdah, hưn mthâo Logo leh anăn Slogan hiu čhưn ênguê čar Kon Tum “Lông dlăng dhar kreh - hiu dlăng čư̆ čhiăng dliê kmrơ̆ng”; ngă kuôl kă bi hgŭm kơ klei đru kơrŭ wĭt dŭm anôk bruă duh mkra hiu čhưn ênguê plah wah čar Kon Tum leh anăn Êpul hgŭm hiu čhưn ênguê 3 ƀuôn prŏng: Hà Nội, Đà Nẵng leh anăn Hồ Chí Minh; Knơ̆ng bruă dhar kreh, mjuăt ktang asei mlei leh anăn hiu čhưn ênguê čar Kon Tum ăt bi klă klei kuôl kă hŏng Êpul hgŭm hiu čhưn ênguê Việt Nam čiăng mđĭ hnơ̆ng tuê hiu čhưn ênguê hriê ti čar./.