VOV4.Ẻđê - Aguah mgi (29/5), ti Sơn La srăng mkŏ mjing klei Khua knŭk kna bi blŭ hrăm hŏng phung ngă lŏ hma Việt Nam thŭn 2022 hŏng akŏ: “Đru ai hŏng phung ngă lŏ hma, mđi kyar bruă lŏ hma krĭng ƀuôn sang hŏng klei kjăp”. Klei bi kƀĭn anei mâo mkŏ mjing ti Sơn La klă anăp lehanăn hŏng online mâo mkŏ truh 62 anôk hlăm kluôm ala. Êjai anăn mâo 300 čô phung ngă lŏ hma kdlưn hĭn bi ala brei kơ 12 êklăk čô phung ngă lŏ hma hlăm kluôm ala mâo nao ti anôk bi kƀĭn.

Anei jing bruă trông čhai yuôm bhăn pioh kơ phung ngă lŏ hma, bruă hgŭm ngă lŏ hma, phung duh mkra, dŭm êpul bruă lehanăn mnuih, phung kreh knhâo ngă hlăm bruă lŏ hma, krĭng ƀuôn sang kluôm ala hưn mdah hŏng knŭk kna, Khua knŭk kna kơ dŭm klei dleh dlan, gun kpăk hlăm bruă hlue nga bruă mđĭ kyar lŏ hma, krĭng ƀuôn sang phung ngă lŏ hma. Pŏk kơ bruă anei, mlan hrue anei (28/5) mkŏ mjing knăm pŏk Festival boh kroh lehanăn mnơ̆ng OCOP Việt Nam thŭn 2022 ti wăl tač Tây Bắc, ƀuôn prŏng Sơn La./.

Y-Khem pô mblang