VOV4.Êđê- Aguah 11/8, Khua knŭk kna Phạm Minh Chính gĭt gai Klei bi kƀĭn Khua knŭk kna hŏng anôk bruă duh mkra thŭn 2022 hŏng akŏ “Pral thâo mdrơ̆ng, kơrŭ wĭt pral leh anăn đĭ kyar hơĭt kjăp. Klei bi kƀĭn dưi mkŏ mjing hlue hdră online plah wah anôk mkŏ Anôk bruă Knŭk kna hŏng Knơ̆ng bruă sang čư̆ êa 63 čar, ƀuôn prŏng hlăm Gưl dlông.

Blŭ hrăm ti anôk bi kƀĭn, Khua knŭk kna Phạm Minh Chính mñă klă, kyua sa êpul êya bruă duh mkra pral thâo mdrơ̆ng, đĭ kyar hơĭt kjăp đru mkŏ mjing sa Việt Nam kjăp ktang leh anăn mdrŏng sah, Knŭk kna, Khua knŭk kna hrăm mbĭt, siă suôr, kah mbha, rŭ mă klei blŭ mguôp mơ̆ng êpul hgŭm, êpul êya anôk bruă duh mkra, mbĭt anăn, mtă kơ êpul êya bruă duh mkra, phung mnia blei lŏ dơ̆ng krơ̆ng kjăp klei đăo, mđĭ ai tiê bi hgŭm, čŏng ngă, čŏng gĭr ktưn hgao klei dleh dlan./.

Pô mblang: H’Zawut Ƀuôn Yă