VOV4.Êđê- Aguah hruê 25/4, dhar bruă ksiêm dlăng gưl dlông mkŏ mjing leh Klei bi kƀĭn kluôm ala jao hdră bruă ksiêm dlăng 3 mlan gưl 1 lehanăn pŏk ngă bruă hlăm 3 mlan gưl 2 thŭn 2022 hluê hdră klă anăp lehanăn online ti dŭm anôk mkŏ hlăm kluôm ala. Trần Cẩm Tú, Khua hlăm Phŭn bruă kđi čar, Khua bruă Đảng gưl dlông, Khua Dhar bruă ksiêm dlăng gưl dlông gĭt gai Klei bi kƀĭn ti Hà Nội. 3 mlan gưl 1 thŭn 2022, hdră ksiêm dlăng dŭm gưl đĭ mkă hŏng wưng anei thŭn êlâo, boh nik ksiêm dlăng leh mâo klei ngă soh. Hdră ksiêm dlăng mâo lu klei mlih mrâo, mđing mđĭ hnơ̆ng tŭ jăk, boh tŭ ksiêm dlăng bruă msir mghaih klei kčŭt hưn mâo hluê ngă pral. Čiăng bi leh hdră kčah ngă bruă thŭn 2022, Dhar bruă ksiêm dlăng gưl dlông ba mdah leh dŭm bruă klam klă klơ̆ng, hlăm anăn mtă kơ dŭm gưl bruă Đảng, dhar bruă ksiêm dlăng ngă bruă pral lehanăn kjăp hĭn hlăm klei kiă kriê lehanăn mkŏ mjing, hluê ngă hdră ksiêm dlăng, đru mguôp hlăm hdră mkŏ mkra, ƀư̆ mkra Đảng lehanăn anôk bruă kđi čar./.

                                                   Pô mblang: H’Nêč Êñuôl