Hlăm thŭn 2025, klei yan adiê ngă luč liê kjham kơ mnuih leh anăn ngăn drăp, anôk bruă nah gŭ, hmăi kơ klei hdĭp mda, klei duh ƀơ̆ng mnuih ƀuôn sang leh anăn dŭm bruă duh mkra ala ƀuôn . Yap truh hruê 31/12/2025, yan adiê ngă kơ 464 čô djiê, luč ka thâo ƀuh, 811 čô êka. Ênoh luč liê đăo tĭng êbeh 104.733 êklai prăk.

Blŭ hrăm ti anôk bi kƀĭn, Khua knŭk kna Phạm Minh Chính mñă klă klei kñăm jing răng mgang klei êđăp ênang, klei hdĭp mnuih ƀuôn sang jing êlâo hĭn; răng mgang ngăn drăp knŭk kna, mnuih ƀuôn sang jăk hĭn; mă mnuih ƀuôn sang jing phŭn hlăm hdră gang mkhư̆ klei yan adiê ngă; gang mkhư̆ klei yan adiê ngă hŏng bruă hlue ngă 2 klei kñăm 100 thŭn leh anăn mđĭ kyar bruă duh mkra pral, hơĭt kjăp leh anăn đru mđĭ kyar dua ênoh mrô. Hlue ngă klei blŭ “Pral gang mkhư̆ - Đăo knăl djŏ klă - Hưn brei răng djŏ guôp - hmao mdrơ̆ng”, Khua knŭk kna mtă kơ dŭm gưl, dŭm dhar bruă, dŭm alŭ wăl hlăm djăp boh klei răng mgang klei suaih pral, klei hdĭp mnuih ƀuôn sang êlâo hĭn, amâo ngă ngơi mang; gang mkhư̆ leh anăn bi hrŏ jih hnơ̆ng klei luč liê; jih jang kyua klei kñăm kơ klei êđăo ênang leh anăn jăk mơak kơ mnuih ƀuôn sang.