VOV4.Êđê -  Aguah mbrue (21/7) klei bi kƀĭn kluôm ala, ksiêm duah, tui hriăm, bi kjăp jih jang hdră mtrŭn klei bi kƀĭn tal 5 Êpul Khua kiă kriê bruă Đảng gưl dlông 13 mâo mkŏ mjing ti sang Bruă kƀĭn ala lehanăn mkŏ online hŏng 63 boh čar, ƀuôn prŏng hlăm kluôm ala.

Ti anôk bi kƀĭn, Khua knŭk kna Phạm Minh Chính bơ̆k bâo leh kơ klei “lŏ dơ̆ng mlih mrâo, bi kjăp klei bhiăn, hdră êlan, mđĭ klei tŭ dưn bruă kiă kriê lehanăn djă yua lăn, mjing boh kdrŭt atăt lăn čar đĭ kyar, mâo hnơ̆ng hrui wĭt đĭ” ti hdră mtrŭn mrô 18-NQ/TW, hrue 16/6/2022 mơ̆ng Êpul khua kiă kriê Đảng gưl dlông kñăm bi lar, mjing klei sa ai kơ klei thâo săng, lehanăn klei ngă bruă hlăm kluôm Đảng, jih jang phung ƀuôn sang lehanăn lĭng kahan ngă bi jăk hdră mtrŭn yuôm bhăn anei.

Khua knŭk kna ktrâo kơ 4 kdrêč hlăm hdră mtrŭn mrô 18, mâo 5 mta tal êlâo mjing atur kơ bruă rŭ mdơ̆ng, bi leh klei bhiăn kơ lăn ala; tal dua klei jing mjêč năng mâo klei bi mlih, bi kjăp klei bhiăn, hdră êlan mđĭ klei tŭ dưn bruă kiă kriê lăn ala; tal 3, hdră êlan klei mĭn mta kñăm; tal 4 jing bruă čuăn, hdră ngă bruă; tal 5 jing mkŏ mjing hlue ngă./.

Y-Khem pô mblang