VOV4.Êđê - Hruê 27/4, ti Hà Nội, Phŭn bruă lĭng kahan mkŏ mjing leh Klei bi kƀĭn online kluôm ala mjuăt bi hriăm Hdră bhiăn răng mgang knông lăn Việt Nam lehanăn dŭm hră m’ar kčah mtrŭn mkăn. Hdră bhiăn răng mgang knông lăn Việt Nam mâo Anôk bruă kƀĭn ala bi mklă hruê 11/11/2020, mâo boh tŭ ba yua mơ̆ng hruê 1/1/2022. Ti anôk bi kƀĭn, phung bi ala dưi ksiêk kjăp lu mta klei hlăm Hdră bhiăn răng mgang knông lăn Việt Nam lehanăn dŭm hră m’ar djŏ hdră bhiăn mkăn. Hluê anăn, Hdră bhiăn răng mgang knông lăn Việt Nam kčah mtrŭn djăp ênŭm, kluôm kơ bruă răng mgang kluôm dhuôm krĭng lăn, knông lăn mơ̆ng ala čar. Boh nik, kčah mtrŭn klă bruă klam mơ̆ng dŭm gưl, anôk bruă, êpul djă phao ktuang lehanăn jih anôk bruă kđi čar hlăm bruă kiă kriê, răng mgang knông lăn ala čar. Hdră bhiăn ăt bi mklă Lĭng kahan răng mgang knông lăn jing sa hlăm dŭm anôk bruă thơ̆ng răng mgang klei êđăp ênang ala čar ti krĭng knông lăn, dưi ba yua dŭm hdră msir răng mgang klei êđăp ênang djŏ si klei kčah mtrŭn./.

H’Nêč pô mblang