VOV4.Êđê - Hruê 8/4, ti ƀuôn prŏng Pleiku, Phŭn bruă Lŏ hma mđĭ kyar krĭng ƀuôn sang bi hgŭm hŏng Anôk bruă sang čư̆ êa čar Gia Lai mkŏ mjing Klei bi kƀĭn kơ boh klei lehanăn hdră êlan mdĭ kyar hbei ƀlang Việt Nam. Ară anei, ala čar drei mâo êbeh 528 êbâo ha hbei ƀlang, lu jing pla ti krĭng kwar Dưr, dưr kwar krah, ktuê hang ksĭ dhŭng kwar krah, lăn dap kngư lehanăn Ngŏ kwar dhŭng. Thŭn 2021, hnơ̆ng mâo hbei ƀlang kluôm ala giăm 10,7 êklăk ton, hlăm anăn mâo 2,9 êklăk ton dưi ba čhĭ kơ ala tač êngao, ênoh prăk giăm 1,2 êklai USD.

Ti anôk bi kƀĭn, K’iăng khua phŭn bruă Lŏ hma mđĭ kyar krĭng ƀuôn sang Lê Quốc Doanh brei thâo, hlăm wưng ti anăp, dŭm êpul êya bruă hlăm Phŭn bruă Lŏ hma mđĭ kyar krĭng ƀuôn sang srăng mđĭ hdră ksiêm dlăng dŭm mjeh hbei ƀlang mrâo mâo hnơ̆ng boh mnga lu, tŭ jăk, dưi bi kdơ̆ng hŏng mnơ̆ng ngă. K’iăng khua phŭn bruă mtă kơ dŭm alŭ wăl lehanăn anôk bruă duh mkra mđĭ hdră duh mkra pla mjing hluê hdră bi hrŏ ênoh bi liê, mđĭ hnơ̆ng mâo boh mnga, mđĭ hnơ̆ng tŭ mnơ̆ng dhơ̆ng, yua kdrăp mrâo, mtrŭt mđĭ hdră mkra mjing, răng mgang wăl hdĭp mda lehanăn pla mjing h’ĭt kjăp./.

H’Nêč pô mblang