VOV4.Êđê - Aguah mbrue (22/4), ti Hà Nội, ti gŭ klei kiă kriê mơ̆ng khua gĭt gai Đảng Nguyễn Phú Trọng, Phŭn bruă kđĭ čar, Êpul kiă kriê bruă Đảng gưl dlông mkŏ mjing leh klei bi kƀĭn kñăm bi kjăp lehanăn hlue ngă hdră mtrŭn mrô 13-NQ/TW hrue 2/4/2022 mơ̆ng Phŭn bruă kđi čar gưl 13, kơ hdră mđĭ myar bruă duh mkra ala ƀuôn, bruă răng mgang klei êđăp ênang hlăm krĭng Dap Mnai Krông Cửu Long truh thŭn 2030, lehanăn tă hdră truh kơ thŭn 2045.

Klei bi kƀĭn anei kñăm bi klă hdră êlan hlue ngă hdră mtrŭn mrô 13, truh hŏng dŭm phŭn dhar bruă, djăp alŭ wăl, mđĭ klei thâo săng, bruă klam klei gĭr mơ̆ng bruă kđi čar hlăm dŭm gưl bruă Đảng dhar bruă êpul êya knuă druh đảng viên, mnuih ngă bruă, kñăm hlue ngă hŏng klei tŭ jing hdră mtrŭn mơ̆ng phŭn bruă kđi čar. Êlâo anăn ti anôk bi kƀĭn mơ̆ng Phŭn bruă kđi čar, Khua gĭt gai Đảng Nguyễn Phú Trọng lač, jing yuôm mâo hdră mtrŭn anei, hŏng bruă klam yuôm bhăn kơ alŭ wăl duh mkra krĭng Dap Mnai Krông Cửu Long./.

Y-Khem pô mblang