VOV4.Êđê- Aguah 11/1, ti Hà Nội, Sang phat kđi yang ƀuôn gưl dlông mkŏ mjing Klei bi kƀĭn kreh knhâo “Mkra mđĭ hdră bhiăn ti Sang phat kđi yang ƀuôn truh thŭn 2030, tă hdră truh thŭn 2045” ngă djŏ klei čiăng mkŏ mjing, bi leh Knŭk kna klei dưi yang ƀuôn ngă phŭn Việt Nam. Khua Phŭn bruă kđi čar, Khua lăn čar Nguyễn Xuân Phúc, Khua Anôk bruă mkra mlih Hdră bhiăn gưl dlông, Khua Anôk bruă gĭt gai Hdră bruă “Hdră mkŏ mjing leh anăn bi leh Knŭk kna mâo klei dưi yang ƀuôn ngă phŭn Việt Nam truh thŭn 2030, tă hdră truh thŭn 2045” nao leh anăn blŭ hrăm gĭt gai. Blŭ hrăm hlăm klei bi kƀĭn, Khua lăn čar Nguyễn Xuân Phúc mtă brei kčĕ dŭm hdră msir mkra mđĭ mrâo hlăm wưng mơ̆ng ară anei truh thŭn 2030, tă hdră truh thŭn 2045 djŏ guôp hŏng boh sĭt ala čar leh anăn hdră mđĭ kyar mbĭt mơ̆ng dlông rŏng lăn. Kƀĭn hlăm dŭm hdră msir mkra mlih kơ klei mkŏ mjing leh anăn bruă ngă mơ̆ng Sang phat kđi yang ƀuôn; mbha bi klă klei dưi kriê dlăng mơ̆ng Sang phat kđi čiăng rơ̆ng klei dưi plah wah dŭm gưl sang phat kđi, mlih mrâo, bi leh hră mởả kčŭt hưn djŏ hdră, tŭ dưn.

Pô mblang: H’Zawut Ƀuôn Yă