VOV4.Êđê - Aguah 21/2 ti sang bruă kƀĭn ala, Khua bruă kƀĭn ala Vương Đình Huệ leh anăn phung K’iăng Khua bruă kƀĭn ala gĭt gai klei bi kƀĭn ksiêm wĭt bruă knuă Êpul gơ̆ng bruă ƀuôn sang dŭm čar, ƀuôn prŏng krĭng wăl nah Dưr thŭn 2021 leh anăn pŏk ngă hdră kčah bruă knuă thŭn 2022. Čiăng msir mgaih klei edu kƀah hlăm hdră ngă bruă mơ̆ng Êpul gơ̆ng bruă ƀuôn sang dŭm gưl hlăm wưng êgao leh anăn mđĭ klei tŭ dưn ngă bruă mơ̆ng Êpul gơ̆ng bruă ƀuôn sang thŭn 2022, Êpul gơ̆ng bruă ƀuôn sang dŭm gưl lŏ dơ̆ng mlih mrâo kơ hdră mkŏ mjing ngă bruă, mđĭ hnơ̆ng jăk ngă bruă mơ̆ng Êpul gơ̆ng bruă ƀuôn sang  mơ̆ng tur knơ̆ng klă klơ̆ng Hdră mtrŭn Klei bi kƀĭn Đảng tal XIII, Hdră mtrŭn Bruă kƀĭn ala, Knŭk kna, Hdră mtrŭn bruă Đảng čar, ƀuôn prŏng leh anăn hdră bhiăn knŭk kna, Êpul gơ̆ng bruă ƀuôn sang pŏk ngă tŭ dưn bruă “mđĭ hnơ̆ng jăk, tŭ dưn bruă ngă mơ̆ng Êpul gơ̆ng bruă ƀuôn sang dŭm gưl, wưng thŭn 2021-2026” čiăng kơ Êpul gơ̆ng bruă ƀuôn sang klă sĭt jing anôk bruă mâo klei dưi knŭk kna ti alŭ wăl, bi ala kơ klei mĭn, klei čang hmăng leh anăn klei dưi ngă khua mơ̆ng mnuih ƀuôn sang.

H’Zawut pô mblang