VOV4.Êđê - Hruê mbruê, ti An Giang mkŏ mjing Klei bi kƀĭn mkŏ mkra êlan knông lăn Việt Nam – Campuchia êđăp ênang, hgŭm bruă hrăm mbĭt mđĭ kyar tal 6 thŭn 2022. Blŭ pŏk knăm anei, Lê Tiến Châu, Khua hlăm Dhar bruă mặt trận čar kwar gưl dlông Việt Nam mñă: Êbeh 5 thŭn bi mklă Klei hưn mthâo boh tŭ Klei kƀĭn mkŏ mkra êlan knông lăn Việt Nam - Campuchia, dŭm bruă dưi pŏk ngă ti djăp gưl, ba wĭt klei tŭ dưn, boh nik dŭm čar mâo mbĭt êlan knông lăn, djŏ hŏng klei čiăng mơ̆ng ƀuôn sang dua ala čar.

Ti knăm anei, phung bi ala bi trông, tĭng dlăng boh tŭ hluê ngă Klei hưn mthâo ti anôk bi kƀĭn tal 5, đru mguôp klei blŭ hlăm hră čih mkra boh tŭ Klei bi kƀĭn mkŏ mkra êlan knông lăn Việt Nam - Campuchia êđăp ênang hrăm mbĭt đĭ kyar tal 6 thŭn 2022, mbĭt anăn mdah klei mlih mrâo kơ mta phŭn, hdră kñăm mđĭ boh tŭ klei bi hgŭm plah wah dua tĭng hlăm wưng kơ anăp./.

H’Nêč pô mblang