VOV4.Êđê - Việt Nam čang hmăng bi kah mbha hnơ̆ng trah dlăng leh anăn klei thâo lu ala čar hlăm bruă kơrŭ wĭt bruă duh mkra- ala ƀuôn mtah, hơĭt kjăp leh anăn kluôm, mđĭ tŭ dưn Hdră kơrŭ wĭt leh anăn mđĭ kyar bruă duh mkra êdei klei ruă Covid-19. Anei jing klei bi mklă mơ̆ng K’iăng Khua Knŭk kna Phạm Bình Minh hlăm Klei bi kƀĭn lu ala čar “Mđĭ kơrŭ wĭt bruă duh mkra Mtah leh anăn kluôm: Klei hriăm mơ̆ng klei thâo lu ala čar” mơ̆ng hdră mđĭ kyar Êpul hgŭm lu ala čar (UNDP) leh anăn Phŭn bruă hŏng tač êngao bi hgŭm mkŏ mjing, mphŭn pŏk aguah hruê 25/2 ti Hà Nội hluê hdră bi tuôm leh anăn online. Blŭ hrăm mphŭn pŏk klei bi kƀĭn, K’iăng Khua Knŭk kna Phạm Bình Minh bi mklă: Mơ̆ng klei thâo hdră mlih mrâo, pŏk ƀăng leh anăn ñŭ kma hlăm êbeh 35 thŭn êgao, grăp knhuang bi mlih mơ̆ng Việt Nam mphŭn mơ̆ng hdră mlih mrâo klei mĭn, klei thâo săng, mđing truh kơ klei tŭ dưn mđĭ kyar sui thŭn, kluôm mơ̆ng lăn čar, mơ̆ng mnuih ƀuôn sang. Leh anăn klei bi kƀĭn hruê anei jing klei găl čiăng Việt Nam mđing hmư̆ klei kah mbha mơ̆ng phung thơ̆ng kơ bruă, dŭm êpul bruă dlông rŏng lăn, phung ksiêm hriăm hlăm ala čar leh anăn ala tač êngao, leh anăn hnơ̆ng trah dlăng, klei thâo lu ala čar hlăm bruă kơrŭ wĭt bruă duh mkra- ala ƀuôn mtah, hơĭt kjăp leh anăn kluôm.

H’Zawut pô mblang