VOV4.Êđê - Aguah 9/3, ti Hà Nội mkŏ mjing klei bi kƀĭn tal sa Klei bi kƀĭn phung mniê kluôm ala tal 13, wưng 2022-2027. Nao hlăm klei bi kƀĭn mâo 1 êbâo čô phung mniê kdlưn hĭn, bi ala kơ dŭm êpul phung mniê, dŭm djuê ana, klei đaŏ leh anăn dŭm bruă ngă mdê mdê hlăm kluôm ala. Klei bi kƀĭn mkŏ mjing mơ̆ng hruê 9/3 truh hruê 11/3. Hŏng akŏ “Mđĭ lar knhuah gru bi hgŭm, mbruă, kyua klei mdrŏng sah lăn čar”, Klei bi kƀĭn lač kơ hdră bruă phung mniê leh anăn bruă ngă Êpul hgŭm phung mniê Việt Nam wưng êgao, kčĕ hdră bruă klam, hdră êdah êdi hlăm wưng 2022-2027 leh anăn ruah Êpul kiă kriê Êpul hgŭm phung mniê Việt Nam gưl 13. Ti anôk bi kƀĭn, phung bi ala ruah Êpul gĭt gai klei bi kƀĭn, êpul čih hră klei bi kƀĭn, bi mklă hdră klei bi kƀĭn leh anăn klei bhiăn klei bi kƀĭn. Êlâo anăn, phung bi ala nao čuă msat Hồ Chí Minh, dưm kwang mnga ti Knưl phung jhŏng ktang êngiă asei Bắc Sơn.

H’Zawut pô mblang