Mkŏ mjing mơ̆ng hrue 18 -20/12, klei bi kƀĭn prŏng mđing trông čhai, mă klei blŭ lehanăn bi mklă mta bruă: Ksiêm wĭt bruă mơ̆ng êpul hgŭm, lehanăn klei bi ktưn hlăm êpul hgŭm phung hriăm gưl prŏng wưng thŭn 2018 – 2023, mâo mta kñăm bruă čuăn, hdră ngă bruă mơ̆ng êpul hgŭm, lehanăn klei bi ktưn hlăm phung hriăm gưl prŏng wưng thŭn 2023 – 2028; klei bi kƀĭn ruah êpul khua kiă kriê mrâo, ruah êpul ksiêm dlăng gưl dlông Êpul hgŭm phung hriăm gưl prŏng Việt Nam gưl XI.  

Klei bi kƀĭn prŏng ăt mđing hmư̆ klei kčĕ đru mơ̆ng êpul khua kiă kriê Đảng, knŭk kna, Êpul khua kiă kriê bruă êdam êra CS Hồ Chí Minh gưl dlông. Anei srăng jing klei tă êlan, yuôm bhăn kơ klei mđĭ kyar bruă knuă mơ̆ng êpul hgŭm phung hriăm gưl prŏng Việt Nam hlăm wưng 5 thŭn tinăp./.