Klei bi kƀĭn lač, klei bi kƀĭn tal 7, bruă kƀĭn ala gưl 15 mâo leh klei tŭ jing jăk siam, bi leh sa ênoh prŏng bruă knuă mkŏ mjing klei bhiăn, bruă ksiêm dlăng lehanăn bi mklă dŭm bruă prŏng kơ lăn čar, lŏ dơ̆ng mlih mrâo, ba wĭt klei tŭ dưn jăk hĭn nanao kơ klei hdĭp. Tui si tĭng, klei bi kƀĭn tal 8 srăng pŏk hlăm hrue 21/10 lehanăn bi ruĕ hlăm hrue 28/11. Ti anôk bi kƀĭn anei, năng ai bruă kƀĭn ala srăng ksiêm, bi mklă truh 11 klei dôk čih mkra hdră bhiăn, lehanăn mă klei blŭ kơ 12 klei bhiăn dôk čiăng čih, ksiêm kơ jih jang bruă duh mkra ala ƀuôn, klei kơ ngăn prăk knŭk kna, ksiêm dlăng bruă ngă klei êmuh lehanăn wĭt lač klei êmuh kơ djăp mta bruă yuôm bhăn mkăn.

Khua bruă kƀĭn ala Trần Thanh Mẫn lač, ênoh kơ bruă mkŏ mjing klei bhiăn, bruă ksiêm dlăng, bruă bi mklă dŭm bruă yuôm bhăn hlăm anôk bi kƀĭn tal 8 mbha 2 gưl čiăng kơ dŭm anôk bruă kƀĭn ala tŭ mă, hlak mblang jih jang klei blŭ mơ̆ng phung bi ala bruă kƀĭn ala hŏng klei jăk hĭn êlâo kơ bruă anôk bruă kƀĭn ala bi mklă./.