VOV4.Êđê - Aguah hruê 10/3, ti Sang bruă kƀĭn ala, pŏk leh Klei bi kƀĭn tal 9 mơ̆ng Dhar bruă gĭt gai anôk bruă kƀĭn ala. Klei bi kƀĭn anei kah mbha 2 gưl, hŏng 8 hruê mă bruă. Gưl 1 mkŏ mjing mơ̆ng ară anei truh kơ hruê 17/3. Năng mđing, klei bi kƀĭn anei, Dhar bruă gĭt gai anôk bruă kƀĭn ala srăng pioh 1 hruê êmuh lehanăn wĭt lač klei êmuh mơ̆ng 2 čô khua hlăm knŭk kna. Khua phŭn bruă tuh tia mnia mblei Nguyễn Hồng Diên lehanăn Khua phŭn bruă Ngăn dŏ wăl hdĭp mda Trần Hồng Hà srăng wĭt lač klei êmuh tal êlâo. Mta phŭn êmuh Khua phŭn bruă Tuh tia mnia mblei Nguyễn Hồng Diên mđing kơ bruă duh mkra pla mjing, mkăp êa pui êa săng, ênoh ênil čhĭ mta mnơ̆ng anei wưng êgao. Mta phŭn wĭt lač klei êmuh Khua phŭn bruă ngăn dŏ wăl hdĭp mda Trần Hồng Hà mđing kơ bruă êmuh lehanăn ksiêm dlăng bruă knuă mơ̆ng anôk bruă kƀĭn ala djŏ tuôm kơ hdră čuăl mkă, kriê dlăng, ba yua lăn krĭng ƀuôn prŏng. Klei êmuh tĭng srăng mkŏ mjing hlăm hruê 16/3, ti Sang bi kƀĭn prŏng Diên Hồng, Sang bruă kƀĭn ala lehanăn mkŏ hŏng hdră mđung rup hŏng 63 Êpul bi ala anôk bruă kƀĭn ala ti dŭm čar, ƀuôn prŏng hlăm gưl dlông lehanăn mâo lu mnuih ƀuôn sang ktuê ksiêm./.

H’Nêč pô mblang