VOV4.Êđê- Hruê anei, 7/7, phung bi lông hlăm kluôm ala klă sĭt mŭt hlăm klei bi lông hriăm jih gưl 3 thŭn anei hŏng klei bi lông ngữ văn hlue si hdră čih, mmông ngă klei bi lông 210 mbĭt. Tlam, bi lông Toán. Kluôm ala mâo 63 Êpul hgŭm bi lông, hŏng 2 êbâo 243 anôk bi lông. Mâo 38 čô bi lông jing F0. Hlue si klei hưn pral mơ̆ng Phŭn bruă sang hră mtô bi hriăm, yap truh 8 mmông 30 mnĭt mmăt hruê 6/7, mâo leh êbeh 989 êbâo čô hđeh nao ti anộ bi lông kluôm ala ngă hră bi lông, adôk êbeh 10 êbâô čô ka ngă hră bi lông. Hlăm aguah anei, phung hđeh lŏ dơ̆ng ngă hră bi lông êlâo kơ bi lông klei hriăm tal êlâo jing Ngữ văn.  Phŭn bruă sang hră leh anăn mtô bi hriăm brei thâo, mkă hŏng gưl bi lông hriăm jih gưl 3 thŭn dih, klei bi lông thŭn anei Phŭn bruă mâo dŭm mta mkra mlih kơ hdră mnêč hlăm bruă mkŏ mjing klei bi lông, kñăm mkhư̆ klei mplư hlăm klei bi lông. Akŏ bi lông thŭn anei srăng kƀĭn hlăm klei hriăm leh anăn ăt mâo klei bi mbha hnơ̆ng thâo mbha mta phung bi lông, djŏ guôp hŏng klei čiăng mơ̆ng lu sang hră gưl prŏng yua boh tŭ klei bi lông čiăng hrŏng ruah./.

                                               Pô mblang: H’Zawut Ƀuôn Yă